Gelísprautun

Mildaðu hrukkur og línur með Gelísprautun

Með aldrinum fáum við hrukkur og fínar línur og er Gelísprautun algeng leið til að fela þær, enda skilvirk meðferð sem skilar hröðum og góðum árangri. Árangur er sjáanlegur strax að meðferð lokinni en það getur tekið u.þ.b. 7-14 daga að sjá sléttast fyllilega úr línunni sem meðferðin var framkvæmd á. Í sumum tilfellum getur það tekið upp í mánuð að sjá endanlegan árangur af meðferð. Endingartími er misjafn, eða frá 6 mánuðum og upp í nokkur ár. Fer hann m.a. eftir meðferðarsvæði, aldri, húðgerð, lífsstíl, vöðvaeiginleikum o.fl. Algengt er að endingartími sé styttri á svæðum þar sem vöðvar eru í mikilli notkun, líkt og í kringum munn. Roði, bólga og mar geta myndast eftir meðferð og varað í 2-7 daga, fer eftir meðferðarsvæði.

Gelísprautun í varir

Varirnar eru eitt vinsælasta meðferðarsvæðið í Gelísprautun og framkvæmum við margar slíkar meðferðir á degi hverjum. Mælt er sérstaklega með því að bera á sig deyfikrem klukkutíma fyrir meðferð á vörum. Mikið er af taugaendum á þessu meðferðarsvæði og meðferðin því nokkuð sársaukafull án deyfingar. Roði, bólga og mar geta myndast eftir meðferð. Þar sem varirnar eru nokkuð viðkvæmt svæði með tilliti til bólgusvörunar er ekki óeðlilegt að bólga geti varað í allt að 14 daga eftir meðferð. Algengt er að fylliefni í vörum endist í u.þ.b. 6-9 mánuði. Sérlega mikilvægt er að kæla meðferðarsvæði vel eftir þessa meðferð.

Fáðu lyftingu með Gelísprautun

Nota má Gelísprautun til að gefa andlitinu lyftingu. Algengt er að fylliefni sé sett í kinnbein til að gefa andlitinu meiri fyllingu og lyfta neðra andliti. Einnig getur fylliefni í kjálkalínu gefið andlitinu skarpari línur og unglegra yfirbragð. Roði, bólga og mar geta myndast eftir meðferð og varað í 2-7 daga. Fylliefni undir augu getur einnig gefið augnsvæðinu bjartara yfirbragð. Svæðið undir augum er þó viðkvæmt og getur bólga eftir meðferð verið lengi að hjaðna, breytilegt á milli einstaklinga hversu lengi.

Til viðbótar við náttúrulegt fjölsykrugel býður Húðfegrun upp á kollagenörvandi fjölsykrugel og er það hið eina sinnar tegundar á markaðnum. Það inniheldur, auk náttúrulegra fjölsykra, náttúrulegt steinefni sem örvar framleiðslu kollagens og gefur húðinni aukna fyllingu. Við mælum með þessari tegund fylliefnis sé ætlunin að gefa kinnbeinum fyllingu sem tapast hefur með aldrinum.

Jafnaðu hlutföll með Gelísprautun

Auk Gelísprautunar í kinnbein, kjálkalínu og varir má einnig jafna hlutföll í andliti með Gelísprautun í nef og höku. Roði, bólga og mar geta myndast eftir meðferð og varað í 2-7 daga.

Almennar upplýsingar til að hafa í huga fyrir Gelísprautun

Fyrir meðferð: Til að draga úr sársauka á meðan á Gelísprautun stendur er mælt með að bera deyfikrem á meðferðarsvæði um klukkustund fyrir meðferð.

Til að draga úr líkum á bólgu og mari eftir meðferð er einnig gott að hafa í huga að gera hlé á notkun magnyls og annarra blóðþynnandi lyfja í 3-5 daga fyrir meðferð sé þess kostur. Það sama á við um inntöku lýsis og áfengis, sem bæði hafa blóðþynnandi áhrif.

Eftir meðferð

Mikilvægt er að kæla meðferðarsvæði vel fyrst eftir meðferð þar sem það dregur verulega úr bólgumyndun.

Ekki má koma við meðferðarsvæðið í 4 klst. eftir meðferð. Eftir þann tíma má strjúka svæðið með mildum andlitshreinsi og vatni. Einnig má þá bera rakagefandi krem á svæðið og nota farða. Mælt er með að forðast sund, óhreint umhverfi og ryk sama dag og meðferð er framkvæmd. Mikilvægt er að nota sterka sólarvörn í a.m.k. viku eftir meðferð og forðast sól eins og hægt er.

Mismunandi fylliefni eru notuð á mismunandi meðferðarsvæði

Notuð eru fyllingarefni með mismunandi eiginleika eftir tilgangi meðferðar. Notað er t.d. þéttara og seigara efni þegar ætlunin er að móta kjálkalínu og kinnbein heldur en þegar þunnum og fínlegum vörum er veitt örlítil fylling. Einnig er þörf á þéttara og seigara efni þegar fyllt er upp í skornar línur á enni heldur en fínar línur á efri vör. Öll fylliefnin eiga það þó sameiginlegt að vera náttúruleg fjölsykrugel. Meðferðin er ekki varanleg þar sem að líkaminn brýtur fylliefnið hægt og rólega niður með tímanum.

Gelísprautun er oft notuð samhliða öðrum meðferðum

Til að ná fram enn betri og heilstæðari árangri er hægt að framkvæma Gelísprautun samhliða öðrum húðmeðferðum. Hægt er að leita ráðgjafar hjá sérfræðingum Húðfegrunar til að finna þær meðferðasamsetningar sem henta þinni húð best. Dæmi um meðferðir sem henta alltaf vel samhliða Gelísprautun eru t.d. Hollywood Glow og Húðslípun.