Háræðaslit og rósroði

Háræðaslit og rósroði meðferði

Lasermeðferð á háræðaslitum er framúrskarandi meðferð sem vinnur vel á grunnum og djúpum háræðaslitum á andliti, bringu og fótum. Lasermeðferð við rósroða vinnur vel á rósroða og rauðum blettum.
Meðferðin er framkvæmd með þeim hætti að lasergeislinn hitar æðina sem verið er að meðhöndla án þess að skaða húð eða nærliggjandi vefi. Í kjölfarið minnkar æðaslitið eða rósroðinn smám saman.

Fjöldi meðferða: Áætla má að framkvæma þurfi meðferð í fjögur til sex skipti fyrir æðar í andliti og að lágmarki í sex skipti fyrir æðar á fótum til að ná góðum árangri. Áætla má að framkvæma þurfi meðferð á rósroða í sex til tíu skipti. Mánuður þarf að líða á milli meðferða.

Eftir að meðferð er framkvæmd geta myndast roði og bólga sem geta varað í einn til tvo daga og allt upp í viku, fer eftir því svæði sem verið er að meðhöndla. Einnig er eðlilegt að í sumum tilfellum myndist hrúður, sár og blöðrur, en mikilvægt er að láta hrúður alveg gróa til að ná hámarksárangri meðferðar. Mælt er með því að bera græðandi krem á húð eftir meðferð og gæta fyllsta hreinlætis svo ekki sé hætta á sýkingu. Einnig er mælt með því að nota stuðningsbuxur í a.m.k. viku eftir meðferð sé um háræðaslitameðferð á fótum að ræða.

Til að ná sem bestum árangri eftir meðferð á æðasliti á fótum er mælt með að:

• Klæðast sokkum/sokkabuxum með góðum stuðningi í viku eftir meðferð.
• Forðast að standa eða sitja lengi.
• Ekki láta fætur hanga sé þess kostur.
• Forðast að krossleggja fætur.
• Forðast áreynslu fyrstu 3 daga eftir meðferð.

Eftir meðferð þarf að

1. Bera græðandi krem á svæðið tvisvar á dag í eina viku.
2. Forðast sól og ljósabekki í a.m.k. viku.
3. Sleppa sundi í einn til tvo daga, breytilegt eftir meðferðarformi.
4. Sleppa líkamsrækt samdægurs.
5. Nota a.m.k. SPF 30 sólarvörn í allavega eina viku.